पापुङमा महिलाहरूका लागि उद्घोषणकला सम्बन्धी तालिम सम्पन्न

रेडियो ताप्लेजुङ

अषाढ १८ गते ।मिक्वाखोला गाउँपालिका वडा नं ५ पापुङमा महिलाहरूका लागि १० दिने उद्घोषण कला तालिम बुधबार सम्पन्न भएको छ।

मिक्वाखोला गाउँपालिकाको आर्थिक सहयोग तथा 'लाम्साङ / मिक्लादेन टोल विकास समिति 'को आयोजनामा सञ्चालित तालिममा स्थानीय ४० जना महिलाहरूको सहभागिता रहेको थियो।

समाजका विभिन्न गतिविधिहरूमा महिलाहरूको सहभागितालाई बढाउने उद्देश्यले सञ्चालित तालिममा महिला नेतृत्व विकासलाई विशेष जोड दिइएको आयोजक संस्थाले बताएको छ।

संस्थाका अध्यक्ष सोनाम टाँसी शेर्पाका अनुसार बोल्नका लागि धेरै डराउने गरेका सहभागीहरूले कार्यक्रम समापनसम्ममा आफूमा निखारता ल्याएका थिए । सहभागीहरू मध्यबाट नै एकजनालाई कार्यक्रमको समापन गर्ने जिम्मेवारी प्रदान गरिएको शेर्पाले जानकारी दिनुभयो ।

५ नम्बर वडा कार्यालय को भवनमा भएको उक्त तालिममा सहजकर्ताको भूमिकामा शान्ता आङ्बुहाङ रहनुभएको आयोजकले बताएको छ।