आठराईमा पहिलो पटक विदेशी खेलाडी

अमृत बास्तोला:-तेह्रथुम ३, बैशाख ।तेह्रथुमको आठराई गाउँपालिकाको केन्द्र संक्रान्तिबजारमा वि.स. २०१५ साल देखि लाग्दै आएको ऐतिहासिक मदनमेलामा पहिलो पटक देश बाहिरका खेलाडीहरु सहभागी भएका छन् ।

गत विहीबार बाट जारी मदन मेलामा अफ्रिका महादेशको आइभेरी कोस्टका दुईजना खेलाडी सहभागी भएका हुन् । देश बाहिरका खेलाडीले पहिलो पटक संक्रान्तिबजार स्थित त्रिमहोन माविको प्राङगणमा खेल देखाएपछि मदन मेलाको रौनक थपिएको छ ।

आठराई गाउँपालिका–२, खाम्लालुङको टिम बाट विदेशी खेलाडी जावाटी र इब्राहिम मेलामा सहभागी भएका हुन् । विदेशी खेलाडी सहितको पहिलो खेल आठराई गाउँपालिका–२, खाम्लालुङ र चम्किलो तारा युवा क्लब ईवा बीच रोचक प्रतिस्पर्था भएको थियो ।

प्रतियोगीतामा ५–० को फराकिलो गोलान्तरले चम्किलो तारा युवा क्लब ईवाले लज्जास्पद हार व्यहोर्दै प्रतियोगीताबाट बाहिरीएको छ । आठराई गाउँपालिका–२ खाम्लालुङ सेमी फाइनलमा पुगेको छ ।